Gakktí Bæinn er grafísk sögusýning sem fjallar um uppbyggingu og arkitektúr í Vestmannaeyjum fyrir Heimaeyjargosið 1973. Í tilefni af 100 ára kaupstaðarafmæli sveitarfélagsins verður sýning á einföldum húsateikningum í grafískum stíl í Fiskiðjuhúsinu að Ægisgötu 2, laugardag og sunnudag sjötta til sjöunda júlí frá 13.00 til 17.00. „Sýningin verður upp sett með þeim hætti að gestir geta gengið um götur og hverfi þar sem fjallað er um arkitekta, byggingarstíla og götumyndir í Vestmannaeyjum,“ segir Kristinn Pálsson, arkítekt og Eyjamaður. „Mikill fjöldi veggspjalda verður til sýnis af byggðum og óbyggðum verkum misþekktra hönnuða ásamt einföldu og fræðandi lesefni. Sýningin er jafnframt hugsuð sem umræðuvettvangur þar sem gestir geta rætt áhrif byggingarlistar á mannlegt umhverfi og hvaða áhrif Heimaeyjargosið hefur haft á ásýnd sveitarfélagsins. Auk þess að sýna hve ábyrgðarmikið hlutverk það er að hanna umhverfið í kringum okkur.“ Sýningin er hugarfóstur Kristins sem hefur stundað nám í arkitektúr bæði hérlendis og í útlöndum. Hann þekkja margir sem fyrrverandi skopteiknara Morgunblaðsins og fyrrum starfsmann Vestmannaeyjabæjar, þar sem hann var meðal annars í undirbúningi Goslokahátíðar síðastliðin ár. Verkefnið er styrkt af Samtökum Sunnlenskra Sveitarfélaga og Vestmannaeyjabæ. Hljóta starfsmenn sveitarfélagsins og tengdir aðilar sem hafa aðstoðað þakkir. Sérstakar þakkir fær Pétur H. Ármannsson, arkitekt, hjá Minjastofnun Íslands.
