Lífið í eyjum stendur og fellur með áreiðanlegum samgöngum og þar gegnir Herjólfur lykilhlutverki og er mikvæg lífæð fyrir samfélagið okkar. Daglegar ferðir skipsins tryggja flæði fólks, vara og þjónustu sem er forsenda þess að atvinnulíf og mannlíf blómstri í Eyjum. Þegar óvissa er með siglingar í Landeyjahöfn hefur það víðtæk áhrif sem ná langt út fyrir einstaka ferðir.  

Skortur á upplýsingum gerir slæmt ástand enn verra

Undanfarin ár hefur ítrekað komið upp staða þar sem upplýsingar um dýpkunarframkvæmdir í Landeyjahöfn eru hvorki nægilega skýrar né tímanlegar. Þessi skortur á upplýsingagjöf hefur raunverulegar afleiðingar. Ferðaþjónustuaðilar geta ekki skipulagt starfsemi sína með eðlilegum hætti, bókanir verða ótryggar og ferðamenn upplifa óvissu sem getur haft áhrif á ákvörðun þeirra um að heimsækja svæðið yfir höfuð.

Fljót og góð upplýsingagjöf getur ekki verið flókin framkvæmd

Fyrir samfélag sem treystir jafn mikið á samgöngur og Vestmannaeyjar gera er gagnsæ og skilvirk upplýsingagjöf ekki aukaatriði, hún er grundvallarforsenda. Þegar upplýsingar berast seint eða eru óljósar skapast keðjuverkun. Fyrirtæki þurfa að bregðast við í flýti, starfsfólk vinnur við óvissu og íbúar finna fyrir skertri þjónustu og tengingu við fastalandið.

Áreiðanlegar samgöngur eru nauðsyn en ekki lúxus

Það er mikilvægt að undirstrika að ferðaþjónustan í Vestmannaeyjum er ekki aðeins afþreying fyrir ferðamenn sem heimsækja eyjuna okkar. Hún er einn af burðarásum í efnahagslífi Vestmannaeyja, skapar störf og styður við fjölbreytt atvinnulíf og skapar afþreyingu fyrir bæjarbúa. Áreiðanlegar samgöngur eru því ekki lúxus heldur nauðsyn. Þegar þær raskast, eða þegar óvissa ríkir um þær, bitnar það beint á lífsgæðum og afkomu fólks.

Gerum kröfur um betri upplýsingagjöf

Því þarf að gera skýrar kröfur um betri upplýsingagjöf varðandi stöðu Landeyjahafnar og dýpkunarframkvæmdir. Reglulegar, aðgengilegar og nákvæmar uppfærslur myndu draga úr óvissu og gera bæði íbúum og atvinnulífi kleift að bregðast við með fyrirsjáanlegri hætti. Með því væri ekki aðeins verið að bæta rekstur samgangna heldur styrkja stoðir samfélagsins í heild. Vegagerðin sem verkkaupi að dýpkunar framkvæmdum og eigandi Landeyjahafnar þarf að gera miklu betur í því að miðla upplýsingum. Samtöl eyjamanna um hvar grafskipið sé eða afhverju það er ekki að grafa þurfa ekki að eiga sér stað ef upplýsingar liggja hratt og örugglega fyrir.

Ef Vegagerðin getur ekki klárað þetta einfalda verkefni  verður Vestmannaeyjabær að taka það að sér

Ef að Vegagerðin getur ekki leyst það einfalda verkefni að miðla til almennings nauðsynlegum upplýsingum um stöðuna í Landeyjahöfn, t.d. stöðuna á dýpkunaframkvæmdum, hvers vegna er ekki verið að dýpka, hvenær má vænta þess að það verðir gert osv.frv.,   þá þarf Vestmannaeyjabær einfaldlega að taka að sér að  sjá um það verkefni. Þetta er ekki flókið verkefni og það eina sem þarf til er vilji og skilningur á mikilvægi góðarar og virkrar upplýsingagjafar til Eyjamanna.

Við getum ekki endalaust beðið eftir því að ríkisstofnunin, Vegagerðin, sem ekki virðist ráða við að leysa þetta einfalda verkefni, geri það og ef til vill væri betra að Vestmannaeyjabær stigi inn í og tæki að sér að miðla þessum upplýsingum til almennings, þó að það eigi auðvitað ekki að vera hans verkefni.

Kjartan Vídó

Höfundur er í 6. sæti á lista Sjálfstæðisflokksins.