Kjarnaborun hófst í Vestmannaeyjum í gær og markar það upphaf verklegra rannsókna á mögulegri vegtengingu milli eyja og lands.

Kjarnaborinn Karl Prins var fluttur til Eyja í liðinni viku og hefur vakið athygli íbúa og vegfarenda undanfarna daga. Um er að ræða öflugt tæki sem notað er til að sækja sýni djúpt úr jarðlögum, en þau munu veita mikilvægar upplýsingar um berggæði og jarðfræði á fyrirhugaðri gangaleið.

Boranirnar fara nú fram á Eiðinu og er gert ráð fyrir að borað verði niður á allt að 300 metra dýpi, að því er segir á vef verkefnisins. Markmiðið er að fá skýra mynd af aðstæðum undir yfirborðinu, sem er forsenda þess að hægt sé að hanna örugg og hagkvæm jarðgöng.

Þessu tengt: Kjarnaboranir hefjast í Eyjum: „Stærsti áfangi í sögu félagsins til þessa“

Áætlað er að þessi áfangi standi yfir í um það bil mánuð. Að honum loknum verður búnaðurinn fluttur yfir í Landeyjasand, þar sem rannsóknir halda áfram við bæinn Kross. Koma borsins og upphaf borana marka mikilvægan áfanga í undirbúningi verkefnisins. Niðurstöður úr borkjörnum eru einn lykilþáttur í mati á hagkvæmni og tæknilegri útfærslu mögulegra ganga milli lands og Vestmannaeyja.

Ljósmyndari Eyjafrétta tók meðfylgjandi myndir á Eiðinu í gær.