Ferðamálasamtök Vestmannaeyja senda frá sér sterkt ákall til stjórnvalda þar sem þau lýsa yfir djúpum áhyggjum af ástandi samgangna til og frá Eyjum. Samtökin segja stöðuna ekki lengur ásættanlega og vara við alvarlegum afleiðingum fyrir atvinnulíf, öryggi og daglegt líf íbúa ef ekki verði gripið til tafarlausra úrbóta. Ákallið – sem er stílað á ráðherra og þingmenn – má lesa í heild sinni hér að neðan.

 

Hæstvirtir ráðherrar og þingmenn.

Það er löngu orðið óásættanlegt ástand í samgöngum við Vestmannaeyjar. Þetta er okkar þjóðvegur og hann er einfaldlega brotinn…

Við upplifum verulega vanvirðingu í þeim viðbrögðum sem ráðherra málaflokksins hefur sýnt í opinberum viðtölum. Skilja þingmenn og ráðherrar ekki alvarleika málsins?

Á sama tíma eru áhrifin á atvinnulífið í Vestmannaeyjum gríðarleg. Fólk og fyrirtæki óttast um framtíð sína. Afbókanir eru orðnar daglegt brauð, tap er farið að bíta, og sumarið  okkar mikilvægasti tími er handan við hornið.

Þetta hefur keðjuverkandi áhrif á allt samfélagið: veitingastaði, afþreyingu, verslun, gistingu og fjölmarga aðra þjónustu. Og ekki síður á daglegt líf bæjarbúa, sem er orðið óviðunandi að búa við þessar aðstæður.

Ferðaþjónustufyrirtæki í Vestmannaeyjum njóta ekki þess lúxus að hafa 12 mánaða rekstrarár. Rekstrargluggi þeirra er aðeins 4–5 mánuðir. Nú er verið að skerða þennan stutta glugga, sem er með öllu óásættanlegt.

Herjólfur er ekki aðeins samgöngutæki, heldur lykilhluti almannavarna, sem undirstrikar mikilvægi þess að samgöngur virki áreiðanlega.

Við erum jafnframt eitt af verðmætustu sveitarfélögum  landsins miðað við framlag á hvern íbúa til ríkissjóðs. Lágmarkskrafa okkar er einföld: að þjóðvegurinn okkar virki.

Þegar svo er ekki, hvað er þá annað í stöðunni en að hækka róminn og senda frá sér þetta ákall?

 

Stjórn Ferðamálasamtaka Vestmannaeyja